Қазақ-өзбек шекарасында еркін экономикалық аймақ құрылады, деп хабарлайды Atameken Business.
Ондағы кәсіпорындар қымбат бағадағы өнімдерді өндіріп, қайта өңдейді. Қазір ол бойынша құжаттарды құзырлы министрліктер әзірлеп жатыр екен. Бұл туралы Өзбекстанның Қазақстандағы төтенше және өкілетті елшісі Саидикрам Ниязходжаев Baq.kz тілшісіне берген сұхбатында айтқан.
Оның сөзінше, екеуара шекарадағы өнеркәсіптік кооперация орталығының капсуласы биылғы көктемде Түркістанда салыныпты. Бүгінде кедендік режимі мен салығы қандай болады деген сынды мәселелер қаралуда.
"Негізінен ауыл шаруашылығы өнімдерін қайта өңдеу, техникалық өнімдерді өндіру кәсіпорындары да ашылуы мүмкін", – деді елші.
Нәтижесінде, екі ел арасындағы сауда айналымын арттырып, бизнестің араласуын күшейтетін көрінеді.
