Ресейдің Мәскеу маңындағы "Алабино" полигонында "Танк биатлоны" байқауы өтеді. Еліміздің Қорғаныс министрлігі осы байқауға қатысу үшін "Мәтібұлақ" оқу орталығының базасында төрт ай бойы дайындық жүріп жатқанын хабарлады.
Байқауға қатысуға іріктеле келіп, команда құрамына кіруге үміткер бес экипаж қалды. Сайыс талаптарына сәйкес "Танк биатлонына" төрт экипаж қатысу керек.
"Танк биатлоны" Армиялық халықаралық ойындардың негізі болып саналады. 2013 жылдан бастап бұл байқау өз бетінше өткізілді. Әскери халықаралық ойындар 2015 жылы басталып, "Танк биатлоны" байқауы негізгі жарыс ретінде кірді.
Айта кетсек, Қазақстан командасы "Танк биатлоны" байқауына жеті рет қатысқан. 2013 жылы қазақстандық танк мамандары командасы екінші орынға ие болса, одан кейінгі жылдары үшінші және төртінші орындарды місе тұтты. 2017 және 2018 жылдары Қазақстан құрамасы тағы да екінші орынға тұрақтады.
Коронавирусты жұқтырудың алдын алу мақсатында "Танк биатлоны" байқауына іріктеу қатысушылары басқа әскери қызметшілерден бөлек жаттығады. Барлық сақтық шаралары сақталып, олардың денсаулық жағдайына бақылау жүргізіледі.
