Қазақстанда екі аптаның ішінде Қызылорда және Түркістан облыстарында люкке құлап, екі бала қаза тапты. Екі жағдайда да люктер әкімдіктерге тиесілі болды. Бұл туралы балалар омбудсмені Динара Закиева мәлімдеді, деп жазады inbusiness.kz сайты.
"Инфрақұрылым қауіпсіздігін қамтамасыз етпеген және балалардың өліміне әкеп соқтырған абайсыздыққа жол берген кінәлі лауазымды тұлғаларды тексеріп, жауапкершілікке тарту қажет деп санаймын. Сондай-ақ, осы саланы қадағалайтын жергілікті атқарушы органдардың басшылары мен аталған аудандардың әкімдерін жауапкершілікке тарту қажет деп санаймын", - деп жазды Динара Закиева әлеуметтік желіде.
Сонымен қатар, балалар омбудсмені өтініштің уәкілетті органдарға жіберілетінін хабарлады.
"Тамыз айында біз мемлекеттік органдармен бірлесе отырып, инфрақұрылымдық қауіпсіздікті қамтамасыз ету шаралары, атап айтқанда, ашық люктер мәселесін көтердік. Еліміздің вице-премьері тиісті тапсырмалар беріп, еріктілермен бірге барлық аймақтарда рейд ұйымдастырды", - деп толықтырды Закиева.
