Қазақстан Республикасы Ғылым және жоғары білім вице-министрі Гүлзат Көбенова Шанхай ынтымақтастық ұйымына мүше мемлекеттердің білім министрлерінің 10-кеңесіне қатысты, деп хабарлайды inbusiness.kz сайты.
Жиында қатысушылар ұлттық білім беру жүйелерін дамыту, инновациялық экономика үшін кадрлар даярлау, ғылыми-білім беру саласындағы ынтымақтастықты кеңейту және 2027–2029 жылдарға арналған басым бағыттарды талқылады.
Өз сөзінде Гүлзат Көбенова цифрлық трансформация жағдайында білім, ғылым және инновацияның маңызы артып отырғанын атап өтіп, Қазақстанда жоғары білім мен ғылым жүйесін жаңғырту, университеттердің ғылыми-зерттеу әлеуетін күшейту, сондай-ақ жасанды интеллект, цифрлық технологиялар және инженерия бағыттары бойынша кадр даярлау жұмыстары жүргізіліп жатқанын айтты.
Қазақстан тарапынан Шанхай ынтымақтастық ұйымы аясындағы ынтымақтастықты дамытуға бағытталған бірқатар бастамалар ұсынылды. Атап айтқанда, Шанхай ынтымақтастық ұйымы университетін негізгі академиялық платформа ретінде дамыту, бірлескен білім беру бағдарламалары мен ғылыми зерттеулерді кеңейту және халықаралық зерттеу консорциумдарын құру ұсынылды.
Сондай-ақ Шанхай ынтымақтастық ұйымы университеті конференциясында Қазақстанның 20-дан астам жоғары оқу орны серіктес университеттермен бірлескен білім беру бағдарламалары мен ғылыми жобаларды жүзеге асырып жатқаны айтылды.
Кеңес қорытындысы бойынша 2035 жылға дейінгі Шанхай ынтымақтастық ұйымы университетінің жаңартылған тұжырымдамасы бекітіліп, Халықаралық математика ғылыми орталығын құру бастамасы қолдау тапты. Сонымен қатар Минск бастамасы мақұлданып, академиялық ұтқырлық пен бірлескен жобаларды дамытуға бейілділік расталды.
"XXI ғасырда мемлекеттердің бәсекеге қабілеттілігі тек экономикалық көрсеткіштермен ғана емес, ең алдымен білім беру сапасымен, ғылымның даму деңгейімен және жаңа білім қалыптастыру қабілетімен айқындалады. Сондықтан ШЫҰ аясындағы білім және ғылым салаларындағы ынтымақтастық өңіріміздің ұзақ мерзімді орнықты дамуының негізгі факторларының біріне айналуға тиіс", - деп атап өтті Гүлзат Көбенова.
Министрлік Шанхай ынтымақтастық ұйымы аясындағы білім және ғылым салаларындағы ынтымақтастықты одан әрі дамытуға дайын екенін жеткізді.
