Әлем чемпионатына жол тартқан Қазақстанның жас шахматшылар командасы мен олардың ата-аналары қардың толассыз жаууынан Румынияда тұрып қалды. Бұл туралы "Бибісара" ЖШС директоры Исатай Аңсат өзінің Facebook парақшасында мәлім етті.
"Біз кеше 20 сәуір күні Яссы (Румыния) қаласына шахматтан әлем чемпионатына қатысу үшін Астанадан (Киев арқылы) Кишинев қаласына ұштық. Кишиневке әрең қондық, қатты боран болды. Қаланы айналшықтап, бір сағат ұшып жүрдік. Ұшқыш бірнеше рет әрекет етіп, ұшақты әрең қондырды", – деп жазды Исатай Аңсат.
Бірақ жас спортшылардың оқиғасы мұнымен бітпейді.
"Жерге қонған соң, мен боранды түні жол жүрмей, Кишиневте қала тұруды ұсындым. Бірақ, румыниялық жүргізуші мені түсінбеді немесе өзінің басқа жоспарлары болды ма екен, Кишиневтен Яссы қаласына жолға шықтық. Жүргізуші жақсы жүргізеді, жай жылдамдықпен таң ата Пуш қаласына 10 шақырым жерде жолда тұрып қалдық. Яссыға дейін әлі 80 шақырым бар. Жол тазалап жүрген көліктер бар, дегенмен жеткіліксіз. Бір орында тұрғанымызға 3 сағат болды. Суымыз азайды, балалар таңғы ас ішпеді. Автобуста 25 азамат бар. Сіздерден сыртқы істер министрлігіне және Қазақстанның Румыниядағы елшілігіне хабар беруді сұраймыз. Бізде байланыс жоқ. Қазір жол бойындағы адамдардан интернетке кіру нүктесін сұрап көремін", – деп хабарлады Исатай Аңсат.
"Бибісара" ЖШС директорының орынбасары Дәурен Әбуов болған оқиғаны растады. "Қазір ғана сөйлестім, олар әлі жол бойында тұр", – дейді ол.
Айта кетейік, бүгін Румынияның таулы аудандарында қар жауды.
