Келісім талаптарына сәйкес, Қазақстанда жұмыс істейтін халықаралық төлем жүйелері интерчейндж мөлшерлемелерін бірден 2 есе төмендетуге міндеттеледі.
"Шекті мөлшерлемелерді кезең-кезеңімен төмендету тәсілі қолданылады. Бірінші кезең 2024 жылы 1 қаңтарда, ал екінші кезең – 2025 жылы 1 қаңтарда басталады: жаппай сегментте (Classic, Gold және басқалары) бірінші кезеңде шекті мөлшерлемелер қазіргіден (1,80%-2,0%-дан) 1,50%-ға дейін, екінші кезеңде – 1,0%-ға дейін төмендейді; премиум сегментте (Platinum, World және басқалары) бірінші кезеңде қазіргіден (шамамен 2,40%-дан) 1,80%-ға дейін, екінші кезеңде – 1,20%-ға дейін төмендету көзделеді; супер премиум сегментте (Infinite, World elite, Diamond және басқалары) бірінші кезеңде мөлшерлемелер қазіргіден (шамамен 2,45%-дан) 2,0%-ға дейін, екінші кезеңде – 1,40%-ға дейін төмендейді", - делінген хабарламада.
Карта төлемдерінде банкаралық комиссиялардың төмендеуі төлем индустриясының одан әрі дамуына оң ықпал етеді және банк комиссияларын төлеуге бизнес субъектілерінің шығындарын қысқартады. Бұл тәсіл қолма-қол ақшасыз төлемдерді одан әрі дамытып, "көлеңкелі экономиканы" әлсіретуде оң әсерін тигізбек.
Анықтама үшін: интерчейндж – сауда-сервистік кәсіпорындарға қызмет көрсететін эквайер-банктер картамен төлем қабылдау кезінде төлем картасы тиесілі эмитент-банкке төленетін эквайрингтік комиссияның бір бөлігі.
