Бұл туралы Энергетика министрлігі мәлім етті, деп хабарлайды inbusiness.kz сайты.
Негізгі бағыттар – радиофармацевтикалық препараттарды өндірудің заманауи жүйесін құру және ядролық технологияларды медицинада қолдануды кеңейту.
Отырысқа қатысушылар – министрліктердің, парламенттің және ғылыми қауымдастықтың өкілдері – Қазақстандағы ядролық медицинаны дамытудың перспективаларын талқылады.
Әңгіме инфрақұрылымды жаңғырту, диагностика мен емдеудің инновациялық әдістерін, ең алдымен онкологиялық ауруларды емдеуді енгізу, кадрларды даярлау және нормативтік базаны жетілдіру туралы болды.
– Бүгінде біз күрделі міндеттермен бетпе-бет келіп отырмыз: радиофармпрепараттар өндірісінің тұрақты жүйесін құру және ядролық медицина инфрақұрылымын дамыту қажет. Бұл міндеттерді шешу үшін мемлекет, ғылым және бизнестің үйлестірілген күш-жігері қажет, сонда қазақстандықтар диагностика мен емдеудің ең заманауи әдістеріне қол жеткізе алады, – деп атап өтті Энергетика министрі Алмасадам Сәтқалиев.
Денсаулық сақтау вице-министрі Ардақ Амангелдиев ядролық медицинаны дамыту бүкіл денсаулық сақтау жүйесі үшін стратегиялық маңызға ие екенін айтты.
– Энергетика министрлігімен бірлесіп, 2030 жылға дейінгі Жол картасы әзірленді. Ол озық технологияларды енгізуге, отандық радиофармпрепараттар өндірісін арттыруға және дәл диагностика әдістерін азаматтар үшін қолжетімді етуге мүмкіндік береді, – деді ол.
Сенат депутаты Айнұр Арғынбекова ядролық медицинаны дамытудың салааралық сипаты туралы айта келіп, табысқа жетудің маңызды факторлары – радиофармпрепараттар өндірісін арттыру мен заңнаманы жетілдіру ғана емес, сонымен қатар білікті кадрларды даярлау екенін атап өтті.
Ядролық физика институтының бас директоры Саябек Сахиев институттың бұл процеске белсенді қатысып, радиофармацевтика саласында жаңа технологияларды әзірлеп, енгізіп жатқанын айтты.
Оның айтуынша, өндірістік қуаттарды кеңейту және зерттеу базасын жетілдіру Қазақстандағы ядролық медицинаны дамытудың негізгі факторларына айналады.
Отырыс қорытындысы бойынша ядролық медицина мен ядролық технологияларды дамыту жөніндегі іс-шаралардың егжей-тегжейлі жоспары (Жол картасы) бекітілді.
Жоспарда ғылыми зерттеулерді қолдау, кадрлар даярлау, саланы технологиялық дамыту және инвестиция тарту бойынша шаралар қарастырылған.
Айта кетейік, Ядролық физиканы (радиохимияны) дамыту жөніндегі кеңес ҚР Премьер-министрінің 2024 жылғы 27 қыркүйектегі №142-р өкімімен құрылды және ядролық ғылым мен технологиялар саласындағы стратегиялық шешімдерді әзірлеу алаңы болып табылады.
Оның қызметі технологиялық прогресті қамтамасыз етуге және Қазақстанның әлемдік аренадағы позициясын нығайтуға бағытталған.
