Өткен тәулікте елімізде 22 табиғи өрт пен жану оқиғасы тіркелді, деп хабарлайды inbusiness.kz сайты.
ТЖМ бөлімшелері мен жергілікті атқарушы органдардың күшімен оның 17-сі сөндірілді.
Қазіргі уақытта Шығыс Қазақстан, Абай, Ақмола және Қарағанды облыстарында 13 табиғи өрт пен жану ошағы бақылауда тұр. Сағат 13:00-дегі мәлімет бойынша Абай және Ақмола облыстарындағы үш табиғи жану ошағы жойылды.
Өрттерді сөндіруге ТЖМ мен жергілікті атқарушы органдардың күштері мен техникалары жұмылдырылған. Аумақтағы жағдай тұрақты бақылауда, сондай-ақ дрондардың көмегімен әуеден мониторинг жүргізіліп жатыр.
Құтқарушылардың басты міндеті – өрттің елді мекендерге, тұрғын үйлерге, шаруашылық нысандары мен ауыл шаруашылығы алқаптарына таралуына жол бермеу.
Жағдай ТЖМ бақылауында.
