Мемлекет басшысының тапсырмасы бойынша ҚР Өнеркәсіп және құрылыс министрлігі ел аумағын геологиялық-геофизикалық зерделеуді кеңейтумен белсенді айналысады. Мақсат - 2026 жылға қарай зерттеу аймағын ағымдағы 1,5 миллионнан 2,2 миллион шаршы шақырымға дейін арттыру, деп хабарлайды Inbusiness.kz сайты.
Бұл қадам елдің перспективалы учаскелерінің геологиялық құрылымын терең түсіну және тау-кен саласына жаңа инвестициялар ағынын ынталандыруға бағытталған.
Министрлік жер қойнауын зерттеудің тиімділігін арттыруға, сондай-ақ жер қойнауын пайдалану процестерін автоматтандыруға күш-жігерін жұмылдырды. Бұл іс-шаралар жергілікті және халықаралық тау-кен компанияларының назарын аударуына мүмкіндік берді. "Minerals.gov.kz" платформасында өтініш берудің автоматтандырылған жүйесін енгізу бұл бағыттағы маңызды қадам болды.
2023 жылғы 2 қазаннан 1 қарашаға дейін Министрлік "minerals.gov.kz" платформасы арқылы 300 000 блокты қамтитын жаңа аумақтарда қатты пайдалы қазбаларды барлауға өтінімдер қабылдады.
"2023 жылғы 20 желтоқсанда e-qazyna.kz платформасында 45 жер қойнауы учаскесінде қатты пайдалы қазбаларды барлау құқығына электрондық аукцион өтті. Аукцион Riotinto, Fortescue, Kratos Resources, Cove Capital, Eczacibasi Holding, Kazakhmys Corporation, ERG Exploration, "Қазгеология" ҰГК, ALINA HOLDING және т.б. осы сияқты ірі компаниялардың назарын аударды. Аукционның жазылу бонусы шамамен 2,5 млрд теңгені құрады", - делінген аталған министрліктің баспасөз қызметі таратқан мәліметте.
Министрліктің бастамалары Қазақстанның тау-кен өнеркәсібі үшін жаңа мүмкіндіктер ашады. Бұл шаралар экономикалық өсуге және осы саладағы әлемдік нарықтағы елдің позициясын нығайтуға ықпал етеді.
