Бұл туралы еліміздегі танымал инвестициялық компанияның өкілдері мәлімдеді. Брокерлердің айтуынша, алпауыт компаниялар акциялары нарықтық бағамен саудаланады. Мысалы, Apple-дың бір акциясы 120 мың теңге болса, Facebook - 80 мың, ал Microsoft - 61 мың теңгенің төңірегінде.
"Біз үшін маңыздысы қазақстандықтардың осындай үлкен компанияларды сатып алуға ұмтылуы. Мысалы, Apple акцияларын алып-сатса, ал жақын адамына зергерлік бұйымның орнына Tiffany акциясын сыйласа керемет емес пе? Біз халықтың ақша жинап, дұрыс инвестициялауды үйренуіне көмектескіміз келеді. Сауда 29 қаңтардан бастап freedom24.kz сайтында жүзеге асырылады",- дейді инвестициялық компания өкілі Вячеслав Ким.
Инвесторлар акцияларды кез келген валютамен сатып ала алады. Мәселен қаржыны теңгемен салсаңыз оны брокерлік жүйе автоматты түрде қажетті валютаға аударады. Мамандардың сөзінше, бұрын Kase-нің листингінде тек екі америкалық компания болса, енді қазақстандық инвесторларға 12 алпауыттың акциялары қолжетімді болмақ.
Атап айтқанда, Tesla, Coca-Cola, Tiffany, Starbucks секілді алып компаниялар листингке шықпақ.
