"Қазгидромет" 2-5 қазан аралығында Қазақстанның бірқатар өңірінде ауа райы күрт өзгеретінін ескертті, деп хабарлайды inbusiness.kz сайты.
4-5 қазанда Астанада жаңбыр аралас қар жауып, оңтүстік-батыстан соғатын желдің екпіні кей уақытта 30 м/с-тан асады. Ауа температурасы 4 қазанда күндіз 8-10 градусқа, 5 қазанда күндіз 3-5 градусқа дейін төмендейді. Қалада 2 қазанда жоғары өрт қаупі де сақталады.
3-4 қазанда Батыс Қазақстан облысында, 3-4 қазанда Атырау облысында жаңбыр мен қар күтіледі. Бұл өңірлерде желдің жылдамдығы 25 м/с-қа дейін жетуі мүмкін. Батыс Қазақстан облысында 3 қазанда солтүстікте қатты жауын-шашын болжанады.
Қостанай, Солтүстік Қазақстан, Ақмола және Павлодар облыстарында 3-5 қазанда жаңбыр мен қар жауып, кей жерлерде қатты жауын-шашын болады. Желдің екпіні 30 м/с және одан да жоғары болуы ықтимал. Осы өңірлерде ауа температурасы да айтарлықтай төмендейді, кей жерлерде түнде 3-5 градусқа дейін аяз күтіледі.
Қызылорда және Жамбыл облыстарында 4 қазанда ауа температурасы күрт төмендейді. Қызылордада күндіз 10-15, солтүстігінде 7 градусқа дейін, Жамбылда 15-20, таулы аудандарда 12 градусқа дейін төмендейді.
Ұлытау облысында 5 қазанда жаңбыр аралас қар жауып, жел 30 м/с-тан асады. Қарағанды облысының солтүстігі мен шығысында, сондай-ақ Павлодар облысының бірқатар ауданында жауын-шашын күтіледі. Бұл өңірлерде жел 30 м/с-қа дейін күшеюі мүмкін.
5 қазанда Алматы және Жетісу облыстарында ауа температурасы күндіз 10-15 градусқа, таулы аудандарда 5 градусқа дейін төмендейді. 2 қазанда Жетісудың таулы аудандарында жаңбыр аралас қар, кей уақытта қатты жауын-шашын күтіледі. Алматы облысының таулы аудандарында да жаңбыр мен қар жауып, жел 15-20 м/с-қа дейін күшейеді.
Жамбыл облысында 2 қазанға қараған түні және таңертең жаңбыр, найзағай, таулы жерлерде тұман күтіледі. Түркістан облысының солтүстігінде және таулы, тау бөктеріндегі аудандарында жаңбыр, найзағай болады. Алматы қаласында желдің екпіні 15 м/с-қа дейін күшейіп, төтенше өрт қаупі сақталады. Шымкентте түнде жаңбыр мен найзағай күтіледі.
Қызылорда облысының солтүстігі мен батысында 2 қазанда жаңбыр, найзағай, желдің екпіні 15-20 м/с болады. Ақмола облысында жел 15-20 м/с-қа дейін күшейіп, жоғары және төтенше өрт қаупі сақталады. Солтүстік Қазақстан облысында жаңбыр мен найзағай, түнде және таңертең тұман күтіледі.
Абай облысында жаңбыр, найзағай, тұман және 15-20 м/с жел күтіледі. Шығыс Қазақстан облысының солтүстігінде тұман болып, жел 15-20 м/с-қа дейін күшейеді. Қостанай облысында түнде және таңертең тұман, күндіз 15-20 м/с жел болады.
Ақтөбе облысында солтүстіктен, солтүстік-батыстан жел соғып, оның екпіні 15-20 м/с-қа жетеді. Маңғыстау облысында жаңбыр мен найзағай, 15-20 м/с жел күтіледі. Батыс Қазақстан және Атырау облыстарында да жоғары немесе төтенше өрт қаупі сақталады.
