2021 жылы елде балалар мобильді құрылғылар арқылы қандай қосымшаларға жиі кіргені белгілі болды, деп хабарлайды inbusiness.kz.
Kaspersky мәліметінше, өткен жылы қазақстандық балалар уақытының көп бөлігін YouTube-те өткізген. Оның үлесі ең танымал он қосымшада өткізілген уақыттың үштен біріне (32%) тиесілі. Екінші орында – WhatsApp (22%), үшінші орында – TikTok (16%) тұр.
"2021 жылы әлемде балалар YouTube-тен ойындарға қатысты контентті іздеді. Мұндай сұраулардың үлесі – 28%. Олар ойын блогерлерінің видеосын табуға тырысқан. Ең танымал ойын – Minecraft. YouTube-тағы MrBeast, EdisonPts және Paluten арналары үздік үштікке енді. Ең танымал ойындардың ондығына алғаш рет Genshin Impact және Poppy Playtime кірді", – деп жазылған хабарламада.
Сондай-ақ балалар YouTube-тен көбінесе музыка іздеген. Олардың үлесі – 19%. Көбінесе BTS, BlackPink, Lil Nas X, Ariana Grande және Twice сынды музыкалық топтар мен әншілердің әндері ізделген. Ең танымал әндердің бірі: CKay – Love Nwantiti, Blackpink тобының мүшесі Lisa-ның Lalisа және Money әндері.
Фильмдер, мультфильмдер мен телешоуларға сұраулардың 12%-ы тиесілі. Көбінесе балалар "Свинка Пеппа", "Лунтик", "Барбоскины" мен "Леди Баг и Супер-Кот" мультфильмдерін және "Веном 2", "Человек-паук: нет пути домой" фильмдерін іздеген.
"Ата-аналар үшін баланың цифрлық қызығушылығын білу маңызды. Бұл балаларды онлайн-қатерлерден қорғауға және отбасында үйлесімді қарым-қатынас орнатуға көмектеседі. Олармен бірге уақыт өткізуге болады. Мысалы, танымал блогердің танымдық бейнелерін көруге немесе Minecraft ойыны арқылы тарихты, химияны немесе физиканы зерттеуге болады", – деді Kaspersky-дің Қазақстан мен Орталық Азиядағы коммерциялық директоры Валерий Зубанов.
