2024 жылдың алғашқы алты айында Қазақстанда электр энергиясын есептегіштер (калибрленгендерді қоса алғанда) өндірісінің айтарлықтай өсуі байқалды. Өткен жылдың сәйкес кезеңімен салыстырғанда өндіріс көлемі 21% өсіп, 198,5 мың дана есептегіш құрал жасалды, деп хабарлайды inbusiness.kz сайты.
Сонымен қатар электр есептегіштерінің импорты 27% өсті. Ағымдағы жылдың алғашқы алты айында 111,3 мың дана өнім импортталды, ал былтырғы сәйкес кезеңде импорт көлемі 87,6 мың дана болды. Шетелден келетін өнімнің нарықтағы үлесі 35,9% құрайды.
Биыл қаңтар-маусым айларында 375 дана есептегіш экспортталды. Қазақстанның ішкі нарығында 2024 жылдың алғашқы жарты жылында 309,4 мың дана электр қуатын есептегіш құрал сатылды.
2024 жылдың бірінші жартыжылдығында электр энергиясы, сондай-ақ газ және сұйықтық есептегіштері Беларус, Қырғызстан, Ресей, Өзбекстан, Германия, БАӘ, Қытай, Грузия, Моңғолия және Түркияға экспортталды. Экспортталған өнімнің жалпы құны 879,4 мың АҚШ долларын құрады.
