ҚР Мәдениет және ақпарат министрлігі "Ұлттық еріктілер желісі" ЗТБ-мен бірлесіп игі істер марафонын бастады. Жоба волонтерлік және қайырымдылық қызметке үлес қосқысы келетін қазақстандықтарды біріктіруге арналған, деп хабарлайды inbusiness.kz сайты.
Маңызды күнтізбелік күндерге, халықаралық мейрамдар мен түрлі әлеуметтік және мәдени тақырыптарға орай "мейірім" апталары мен жыл сайын дәстүрлі тақырыптық іс-шаралар өткізу жоспарлануда. Іс-шара тақырыбы жыл сайын өзгеріп отырады.
Игі істер марафонының бірінші аптасы экологияға арналған. Жобаға қатысу үшін өз игі ісіңізді әлеуметтік желіде жариялап, Qazvolunteer.kz онлайн-платформасында тіркеуден өту қажет.
Марафон қорытындысы бойынша ең белсенді қатысушылар алғыс хат және естелік сыйлықтармен марапатталады.
Жобаға қатысу үшін толық ақпарат пен нұсқаулықты Qazvolunteer.kz сайтынан және @kz_nvs және @qazvolunteer.kz әлеуметтік желілерінен алуға болады.
