"Еңбек ресурстарын дамыту орталығы" АҚ алаңында мемлекеттік органдардың, халықаралық ұйымдардың, сарапшылар мен ғылыми қауымдастық өкілдерінің қатысуымен дөңгелек үстел өтті, деп хабарлайды inbusiness.kz сайты.
Шетелдік адами капиталды тарту тетіктерін жаңғыртуға, көші-қон процестерін цифрландыруға, сондай-ақ шетелдік мамандар, инвесторлар мен кәсіпкерлер үшін елге келу, тұру және ұзақ мерзімді еңбек қызметін жүзеге асыруға қолайлы жағдай жасауға ерекше назар аударылды.
"Құжатта жоғары білікті мамандарға, инвесторлар мен кәсіпкерлерге бірқатар артықшылықтар ұсынатын арнайы “Алтын виза” енгізу, сондай-ақ “e-Residency” модулі мен “e-Residency Invest” бағдарламасын қамтитын бірыңғай цифрлық QazETA платформасын іске қосу қарастырылған", – деді Ербол Тұяқбаев.
Халықаралық көші-қон ұйымының өкілдері аталған бастамаларды қолдап, елдің инвестициялық тартымдылығын арттырудағы және болашақ экономика үшін кадрлар даярлаудағы стратегиялық маңызын атап өтті.
"Президент Қасым-Жомарт Тоқаевтың тапсырмаларын іске асыру халықаралық білікті мамандар мен инвестицияларды тартуға ғана емес, сонымен қатар қазақстандық жастарды болашақ еңбек нарығына дайындауға да жаңа мүмкіндіктер ашады", – деді ХКҚҰ миссиясы басшысының м. а. Әлия Белоносова.
