Бұл тақырыпқа Үкімет отырысында ҚР Индустрия және инфрақұрылымдық даму министрі Бейбіт Атамқұлов тоқталды, деп жазды inbusiness.kz.
"Ішкі нарықты ең сұранысқа ие отандық құрылыс өнімдерімен қамтамасыз ету бойынша жұмыс жалғасады. "Самұрық-Қазына Құрылыс" АҚ-мен бірлесіп 8 616 жаңа жұмыс орнын құру арқылы жалпы сомасы 601,3 млрд теңгені құрайтын импортты алмастыру бойынша 35 жобаны жүзеге асыру жоспарлануда", – деді Бейбіт Атамқұлов.
Оның айтуынша, құрылыс саласын отандық тауарлармен қамтамасыз ету үшін жаңа өндіріс орындарын ашу жоспарлануда. Айталық, санитарлық-техникалық бұйымдар, керамикалық плиткалар және тағы басқа.
"Бұл жобаларды енгізу ішкі нарықтағы импорт үлесін шамамен 60%-ға қысқартып, құрылыс материалдары бағасының құбылуын болдырмайды", – деп түйіндеді министр.
Құралай Құдайберген
