Enbek мобильді қосымшасы енді жаңа дағдылар мен құзыреттерді алуға мүмкіндік береді. Енді смартфон арқылы Skills Enbek кәсіптік оқыту платформасында орналастырылған курстардан өтуге болады, деп жазады inbusiness.kz сайты.
Қосымшаны қолданушылар оқу курстарын кеңейтілген іздеуге қол жеткізе алады. Сондай-ақ, берілген мамандықтар немесе дағдылар бойынша таңдау және кілт сөздерді (мамандық немесе курс атауы) іздеу мүмкіндігіне ие.
Сонымен қатар, курсты таңдаған кезде пайдаланушы оның сипаттамасымен, ұзақтығымен, сабақтар мен тапсырмалар санымен, автормен және шолулармен таныса алады. Пайдаланушыларға ыңғайлы болу үшін авторлардан кері байланыс "Диалогтар" бөлімінде қолжетімді болмақ.
Сондай-ақ, оқу барысы мен оқу тарихы жеке кабинетте, "менің оқуым" бөлімінде қолжетімді. Курсты сәтті аяқтағаннан және қорытынды тестілеуден өткеннен соң, жүктеуге болатын электрондық сертификат беріледі. Бұнымен қоса, аяқталған курс бойынша алынған дағдылар мен сертификаттар Enbek.kz сайтындағы пайдаланушының түйіндемесінде автоматты түрде көрсетіледі.
Осылайша, Enbek мобильді қосымшасында қазіргі уақытта келесі мүмкіндіктер бар: жұмыс іздеу, жұмыссыздарды тіркеу, жұмысынан айырылған жағдайда әлеуметтік төлемдерді алу, business.enbek.kz кәсіпкерлікті қолдау қызметтеріне қол жеткізу және Skills Enbek курстарында оқу.
