Қазақстанда онкологиялық ауруларды ерте анықтауға арналған скринингтер мен заманауи диагностика көлемі артып келеді, деп хабарлайды inbusiness.kz сайты.
2026 жылдың бірінші жартыжылдығында 17,4 мың ПЭТ/КТ зерттеуі жүргізілді. Бұл өткен жылдың сәйкес кезеңінен 21,6%-ға көп.
Халықты онкологиялық скринингпен қамту көрсеткіші де 37,6%-дан 41,7%-ға дейін өсті.
Иммуногистохимиялық зерттеулердің саны 2024 жылғы 33,6 мыңнан 2025 жылы 65,1 мыңға жетті. Бұл ісіктің ерекшеліктерін анықтап, емдеу тәсілін нақтылауға мүмкіндік береді.
Сондай-ақ сәулелік терапиямен қамту 65%-ға дейін кеңейді. Ұлттық ғылыми онкология орталығының жаңа корпусы іске қосылғаннан кейін Қазақстанда алғаш рет протондық терапия қолжетімді болды. Биылғы алғашқы алты айда 3 897 протондық терапия емшарасы және 9 239 сәулелік терапия сеансы өткізілді.
2025 жылы өңірлердегі онкология орталықтары 27 млрд теңгеден астам заманауи медициналық жабдықпен қамтамасыз етілді.
2026 жылдың соңына дейін дәлдігі жоғары диагностика бойынша алғашқы референс-орталықтарды және Қарағанды облысында жаңа ПЭТ/КТ орталығын іске қосу жоспарланған.
