Қазақстанда техникалық және кәсіптік білім беру жүйесін жаңғырту жұмыстары қарқын алды, деп жазады inbusiness.kz сайты.
Жоғары технологиялық экономиканың сұранысына жауап беретін мамандар даярлау мақсатында мемлекеттік білім беру тапсырысы 145 мың орынға дейін ұлғайтылды. Бұл – өндіріс пен нақты секторға қажетті кадрлық әлеуетті күшейтуге бағытталған жүйелі шешім.
Жұмыс берушілермен бірлесіп 11 мыңнан астам білім беру бағдарламасы әзірленді. Бағдарламалар кәсіби стандарттар мен WorldSkills талаптарына негізделген. Бұл студенттердің құзыретін халықаралық деңгейге сәйкестендіруге мүмкіндік береді.
Қазақстан құрамасы Данияда өткен EuroSkills Herning 2025 чемпионатында 7 "Үздік медальон" иеленді. Аталған нәтиже техникалық білім беру сапасының әлемдік аренада мойындала бастағанын көрсетеді.
Сонымен қатар ақпараттық технологиялар бағытында онлайн-оқыту заңнамалық тұрғыда енгізілді. Колледждерде бағдарламалау, киберқауіпсіздік, деректерді талдау, жасанды интеллект негіздері сияқты заманауи бағыттар кеңінен оқытылады. Бұл түлектердің еңбек нарығына тез бейімделуіне және бәсекеге қабілетті болуына жол ашады.
Қазіргі уақытта 43 мыңға жуық студент кәсіпорындардың нысаналы мемлекеттік тапсырысы аясында білім алуда. Олардың шамамен 8 мыңы оқуын аяқтап, тұрақты жұмысқа орналасқан.
