"ҚР ДСМ СЭБК "Ұлттық сараптама орталығы" ШЖҚ РМК Нұр-Сұлтан қаласы бойынша молекулярлық-генетикалық зерттеулер зертханасы толық геномдық секвенирлеу әдісімен COVID-19 оң нәтижесі бар 265 үлгіні зерттеді. SARS-CoV-2 вирусының генетикалық сипаттамасына бұл сынамалар Қазақстан Республикасының 14 өңірінен алынды. Нуклеотидтер тізбегін талдау нәтижесінде мамандар 12 вирустан "британиялық штамм" генотипін анықтады",– деп жазылған орталық таратқан хабарламада.
12 штамның 8 жағдайы Шарм-эль-Шейх (Мысыр) және Дубай (Біріккен Араб Әмірліктері) халықаралық рейстері арқылы келген азаматтардан табылған. Қазіргі уақытта бұл елдерде SARS-CoV-2 коронавирусының "британиялық" және "оңтүстікафрикалық" штамдары көп байқалуда.
Сондай-ақ "британиялық штамның" генотипі бар 4 вирус Нұр-Сұлтан, Алматы қалаларында және Ақтөбе облысында табылған. Орталық вирус шетелден келген азаматтардан таралуы мүмкін деп болжап отыр.
