2025-2026 оқу жылында Қазақстанның жоғары оқу орындарында әлемнің 88 елінен келген 35 075 шетелдік студент білім алды. Бұл өткен оқу жылымен салыстырғанда 11%-ға жоғары көрсеткіш, деп хабарлайды inbusiness.kz сайты.
Шетелдік білім алушылар санының артуы Қазақстанның Орталық Азиядағы білім беру орталығы ретіндегі тартымдылығының күшейіп келе жатқанын көрсетеді.
Жоғары білімнің халықаралық бәсекеге қабілеттілігін арттыру Қазақстан Республикасының 2023-2029 жылдарға арналған жоғары білім мен ғылымды дамыту тұжырымдамасындағы негізгі бағыттардың бірі саналады. Мемлекет басшысының тапсырмасына сәйкес, 2029 жылға қарай Қазақстанда білім алатын шетелдік студенттер санын 100 мың адамға жеткізу жоспарланған.
Сарапшылардың айтуынша, Қазақстанды шетелдік студенттер үшін тартымды ететін факторлардың қатарында білім беру құнының қолжетімділігі, тиімді географиялық орналасуы, ағылшын тіліндегі бағдарламалардың көбеюі және медицина, инженерия, ақпараттық технологиялар салаларындағы мамандарға сұраныстың жоғары болуы бар.
Қазіргі таңда елімізде әлемнің түрлі мемлекеттерінен келген 30-дан астам жоғары оқу орнының филиалы жұмыс істейді. Олардың қатарында Cardiff University, Coventry University Kazakhstan және АҚШ, Оңтүстік Корея, Италия, Ресей, Қытай, Франция университеттерінің өкілдіктері бар.
Бұл оқу орындары кадр даярлау сапасын арттыруға, академиялық байланыстарды кеңейтуге және Қазақстанның жоғары білім жүйесін халықаралық кеңістікке ықпалдастыруға мүмкіндік береді.
Алдағы уақытта шетелдік студенттер санын арттыру үшін ағылшын тіліндегі білім беру бағдарламаларын көбейту, университет инфрақұрылымын жаңарту, жатақхана желісін кеңейту және шетелдік жастар үшін қолайлы жағдай жасау жұмыстары жалғасады.
