Қазақстанда қолма-қол ақшасыз есеп айырысу инфрақұрылымының дамуы төлем карталары нарығынан ілгерлеп кетті, деп хабарлайды ranking.kz. Қолма-қол ақшасыз төлем жасау әдісінің дендеп ену көрсеткіші әсіресе Астанада жоғары. Орташа алғанда бір POS-терминалға бар-жоғы 36 картадан келеді. Жыл ішінде елордада карталарды қабылдайтын сауда орындарының саны екі есеге – 5 мыңнан 9,9 мыңға артқан. Ал ең төмен көрсеткіш – Жамбыл облысында. Онда бір POS-терминалға 185 активті картадан келеді. Бұл көрсеткіш ОҚО-да – 177 қана. Қолма-қол ақшасыз төлем жасау инфрақұрылымы төлем карталарына қарағанда қарқындап барады. Мәселен, бір жылда пайдаланылатын карталардың саны бар болғаны 11%-ға, 7,9 млн бірлікке көбейген. Ол негізінен Алматыда көрініс тауып отыр. Жыл ішінде аталған қалада активті карталардың саны 397 мыңға, ал жалпы еліміз бойынша 764 мыңға артқан.
