Қазақстанда кейінгі он жылда туберкулезден болатын өлім-жітім көрсеткіші бес есе төмендеді, деп жазады inbusiness.kz сайты.
Оның айтуынша, 2014 жылы туберкулезден болатын өлім-жітім 100 мың тұрғынға шаққанда 4,9 жағдайды құраса, 2025 жылы бұл көрсеткіш 0,9-ға дейін азайған. Осы кезеңде аурудың таралу деңгейі де 2,5 есе қысқарып, 100 мың тұрғынға шаққанда 105,9-дан 38,9-ға дейін төмендеген.
Шахимұрат Исмайылов бұл нәтижелер Ұлттық туберкулезге қарсы бағдарламаны жүйелі түрде іске асырудың арқасында мүмкін болғанын атап өтті. Оның сөзінше, молекулалық-генетикалық диагностика әдістерін енгізу, тиімділігі жоғары жаңа препараттарды қолдану және профилактикалық шараларды күшейту маңызды рөл атқарған.
– Қазақстанда туберкулезді анықтаудың жедел молекулалық-генетикалық әдістері кезең-кезеңімен енгізіліп жатыр. Сонымен қатар тиімділігі жоғары жаңа препараттар қолданылып, профилактика тетіктері жетілдірілді. Бұл END TB стратегиясының мақсаттарына сенімді түрде ілгерілеуге мүмкіндік береді, – деді ол Алматы өңірлік коммуникациялар қызметінде өткен брифингте.
Сондай-ақ профессор туберкулезбен күреске бағытталған инвестициялардың экономикалық тиімділігіне де тоқталды.
– Туберкулезбен күреске салынған әрбір доллар медицина саласы үшін ғана емес, жалпы экономикаға 43 АҚШ доллары көлемінде пайда әкеледі. Ұлттық бағдарламаны тұрақты қаржыландыру денсаулық сақтау жүйесін нығайтуға ықпал етеді, – деді Шахимұрат Исмайылов.
