2023 жылдың сәуір айының қорытындысына сәйкес, өсімдік майының бағасы бір жылда 8,6%-ға өсті. Оның ішінде күнбағыс майы 8,3%-ға, зәйтүн майы 20,6%-ға қымбаттады, деп жазады inbusiness.kz energyprom.kz порталына сілтеме жасап.
Республика бойынша өсімдік майының бағасы Қарағанды облысында елеулі деңгейде өсті: +17,9%. Антилидерлер үштігінде Астана мен Маңғыстау облыстары бар. Бағаның ең төмен өсімі Алматы облысында тіркелді: +3,2%.
Бұл ретте күнбағыс майы Қарағанды облысында, ал зәйтүн майы Павлодар облысында айтарлықтай қымбаттады. Күнбағыс майы бағасының ең аз жылдық өсімі Алматы облысында, зәйтүн майы бойынша Ұлытау облысында байқалды.
Биылғы қаңтар-наурыз айларында елімізде 171,4 мың тонна тазартылған және тазартылмаған өсімдік майы өндірілді: жылдық өсім – 23,7%.
Бір жылда тазартылған май өндірісі 8,1%-ға азайса, тазартылмаған май шығару 36,3%-ға өсті.
