Энергетика министрлігі жобаны жүзеге асыру үшін бірнеше өңірді, соның ішінде Маңғыстау облысын да қарастырып отыр. Бұл туралы премьер-министр Олжас Бектеновтің депутаттық сауалға берген жауабында айтылған, деп жазады inbusiness.kz сайты.
Жаңа мұнай өңдеу зауытының құрылысы 2025-2040 жылдарға арналған мұнай өңдеу саласын дамыту тұжырымдамасы аясында жүзеге аспақ.
Құжатқа сәйкес, жоба бірнеше кезеңмен іске асырылады:
- 2028-2030 жылдары – техникалық-экономикалық негіздеме (pre-FEED) әзірленеді;
- 2030-2032 жылдары – жобалық-сметалық құжаттар дайындалады;
- 2032-2040 жылдары – зауыттың құрылысы жүргізіледі.
Болашақ кәсіпорын көмірсутек шикізатын терең өңдеуге және ТС-1/Jet A-1 санатындағы авиациялық отын өндіруге бағытталмақ.
"Маңғыстау облысында қуаттылығы жылына 5 млн тонна жаңа мұнай өңдеу зауытын салу алдын ала инвестиция тартуды талап етеді, сонымен қатар инвестицияның өтелуін қамтамасыз ету үшін авиаотынның өзіндік құны жоғары болатынын ескерген жөн", – деп жазылған Үкімет басшысының жауабында.
Қазіргі таңда елімізде 3 ірі мұнай өңдеу зауыты жұмыс істейді. Олар Атырау, Павлодар және Шымкент қалаларында орналасқан. Бұл зауыттарды жаңғыртудан кейін авиаотын өндірісі жылына 300 мың тоннадан 633 мың тоннаға дейін артқан.
