Ұйым техникалық кеңесші мәртебесін иеленді, деп хабарлайды inbusiness.kz сайты.
Жобалаудан бастап, құрылыс сатысына дейінгі жұмыстарға Assystem мамандары атсалысады. Компания БАӘ, Сауд Арабиясы, Түркия сынды елдерде өз жобаларын табысты жүзеге асырған.
Сондай-ақ, Франция мен Ұлыбританияда Ұлттық атом бағдарламасына жетекшілік етті.
Assystem Group Бас директорының орынбасары Стефан Обарбье ынтымақтастыққа ризашылығын білдіріп, Қазақстандағы атом электр станциясы әлемдік стандарттарға сай, қауіпсіз әрі тиімді болуына назар аударылатынын жеткізді.
– Біз Қазақстанмен оның жаңа атом энергетикалық бағдарламасы аясында ынтымақтастық орнатқанына қуаныштымыз. Assystem командасы осындай маңызды бағдарламаға қатысуға қуанышты және оның АЭХА және ҚАЭС талаптарына сәйкес келетін қауіпсіз әрі тиімді жүзеге асырылуына ерекше назар аударады, – деп мәлімдеді Assystem Group Бас директорының орынбасары Стефан Обарбье.
Assystem – атом энергетикасы саласындағы әлемдегі жетекші тәуелсіз инжинирингтік компаниялардың бірі, тұрақты энергетикаға көшуді жеделдетуге ұмтылады.
Қауіпсіздік пен қорғанысқа қатаң талаптары бар жоғары реттелетін салаларда 55 жылдан астам тәжірибесі бар, күрделі инфрақұрылымдарды өмірлік циклының барлық кезеңдерінде пайдалану тиімділігін арттыру үшін инжиниринг, жобаларды басқару және цифрлық шешімдер ұсынумен айналысады.
Assystem компаниясының 12 елдегі 8000 сарапшысы энергетикалық ауысымды іске асыруға атсалысуда.
Қолжетімді әрі төмен көміртекті энергиямен қамтамасыз ету мақсатында компания төмен көміртекті генерацияны (атомдық және жаңартылатын энергетика, электр желілері) және таза сутекті дамыту бағыттарын белсенді ілгерілетіп жатыр.
