Еліміздегі заңды тұлғалардың саны бір жыл ішінде 7,9%-ға ұлғайды. Осылайша, 2022 жылғы мамырда 367,6 мыңды құрап отыр, деп жазады inbusiness.kz Finprom.kz-ке сілтеме жасап.
Жұмыс істегеніне 1-5 жыл болған кәсіпорындар саны 139,6 мың. Бұл 2021 жылғы мамырмен салыстырғанда 7,5%-ға артық.
Құрылғанына 6 жылдан 10 жылға дейін уақыт болған компаниялар саны 73,3 мың болса, 11-15 жыл болған мекемелер саны 45 мыңға жетті.
Ашылғанына 1 жыл болмаған кәсіпорындар саны 44 мыңға жуықтап, олардың саны былтырғы жылға қарағанда 12%-ға өскенін атап өту қажет.
Ширек ғасырдан бері жұмыс істеп жатқан кәсіпорындар да бар. Еліміз бойынша олардың саны 6,7 мыңды құрайды. Бір жыл ішінде мұндай компаниялар саны бірден 36,3%-ға өскен.
Соңғы жылдары жұмыс істеп тұрған кәсіпорындардың жартысынан астамы Алматы мен Нұр-Сұлтанда ашылған. Оңтүстік астанада құрылғанына 1 жыл болмаған заңды тұлғалар саны 12,6 мыңды құрап, қаладағы барлық жұмыс істеп тұрған кәсіпорындардың 13,5%-ын құрайды. Ал Елордада мұндай мекемелер саны 9,9 мыңға (14,9%) жетті.
Өңірлер бөлінісінде айырмашылық бар екендігін көруге болады. Мысалы, Қызылорда облысында жаңадан ашылған кәсіпорындар саны 821 болса, Атырау облысында – 840.
