"Самұрық-Энерго" жобаларының портфелінде бірнеше су электр станцияларын салу бойынша инвестициялық жобалар пысықталып жатыр. Бұл туралы "Самұрық-Энерго" АҚ Басқарма Төрағасы Қайрат Мақсұтов Үкімет отырысында хабарлады, деп хабарлайды inbusiness.kz сайты.
"Іле өзенінде қуаттылығы 50 МВт Кербұлақ ГЭС-і, Ертіс өзенінде қуаттылығы 300 МВт-ға дейін Семей ГЭС-і және Шелек өзенінде қуаттылығы 70 МВт ГЭС-29. Осы жобалар бойынша жобалау алды құжаттаманы әзірлеу, сондай-ақ, құрылыс үшін жер учаскелерімен қамтамасыз ету бойынша жергілікті атқарушы органдармен жұмыс жүргізіліп жатыр. Сондай-ақ, Семей ГЭС жобасына қазіргі уақытта әлеуетті инвесторларды іздеу жұмыстары жүргізілуде, Семей ГЭС-і бойынша Катардың Небрас Пауэр компаниясымен, Шелек өзеніндегі ГЭС бойынша қытайлық серіктес Пауэр Чайна компаниясымен ынтымақтастық қарастырылып отыр", - деді Қайрат Мақсұтов.
"Самұрық-Энерго" АҚ Басқарма Төрағасының сөзінше, Кербұлақ ГЭС-ін өз күшімізбен салу жоспарланып отыр.
"Жоғарыда аталған гидрожобаларды іске асыруды аяқтау 2027-2028 жылдарға болжанып отыр. Осы ГЭС салу жобаларын ойдағыдай іске асыру үшін Энергетика министрлігімен инвестицияларды қайтару механизмін айқындау жолында бірлесіп жұмыс істеп жатырмыз", - деп толықтырды спикер.
Айта кету керек, осыған дейін Ресей салатын үш ЖЭО бойынша қандай жұмыс жүргізіліп жатқанын жазған болатынбыз.
