Радиоэлектроника және байланыс әскери-инженерлік институтында курсанттардың ғылыми-зерттеу және жобалау жұмыстарына ерекше көңіл бөлінеді, деп хабарлайды inbusiness.kz сайты.
Болашақ офицерлер әскери даярлықпен қатар, қорғаныс және қауіпсіздік саласына қажетті заманауи инженерлік шешімдер әзірлеуде.
Солардың бірі – 3-курс курсанты Шыңғысхан Шынтемировтың жобасы. Ол басқару және байланыс арналарына радиоэлектрондық әсер етуге, кедергілер жасауға және ұшқышсыз ұшу аппараттарына қарсы әрекет етуге арналған шағын құрылғы әзірледі. Жоба Wi-Fi желілерінің жұмысын шектеуге мүмкіндік береді және арнайы міндеттерді орындауда қолдануға бағытталған.
Ал курсант Василий Копильцев автокөліктердің астыңғы бөлігін тексеруге арналған Under Car Vision құрылғысын ұсынды. Жүйе түрлі ауа райы жағдайында сапалы бақылау жүргізуге мүмкіндік береді. Құрылғы электр желісінен де, аккумулятор арқылы да жұмыс істей алады.
Институт өкілдерінің айтуынша, курсанттарды ғылыми жобаларға ерте кезеңнен тарту олардың инженерлік ойлау қабілетін дамытып, тәжірибелік дағдыларын қалыптастыруға мүмкіндік береді.
Қазіргі уақытта әскери оқу орнында әзірленген жобалар түрлі көрмелерде, байқауларда және ғылыми-практикалық конференцияларда таныстырылып келеді. Бұл болашақ әскери инженерлердің ғылыми және инновациялық әлеуетін арттыруға ықпал етеді.
