Қазақстан өкілдері АҚШ Қарулы Күштерінің Орталық қолбасшылығы өткізетін халықаралық әскери оқу-жаттығуға қатысты, деп жазады inbusiness.kz сайты.
Екі апта бойы оған 10 елден 350-ден астам әскери қызметші, сондай-ақ АҚШ Ұлттық гвардиясының 10 бөлімшесінің өкілдері қатысты. Оқу-жаттығу барысында командалық-штабтық өзара іс-қимыл, далалық тактика және киберқауіпсіздік сценарийлері пысықталды. Қатысушылар сонымен қатар қоян-қолтыс ұрыс, ұшқышсыз ұшу аппараттарын қолдану, жергілікті жерде бағдарлау және жауынгерлік жағдайда медициналық көмек көрсету бойынша дайындықтан өтті.
Америка тарапының мәліметінше, 11 күндік шара түрлі елдердің әскерилері арасындағы өзара іс-қимылды нығайтуға, жедел үйлесімділікті және бірлескен әрекеттерге дайындықты арттыруға бағытталған.
"Сенім дағдарыс кезінде қалыптаспайды, ол дағдарысқа дейін қалыптасады. Біз барлық қатысушылар арасында серіктестік, үйлесімділік, сенім мен түсіністік орнатып жатырмыз", – деді CENTCOM-нан оқу-жаттығудың жетекші жоспарлаушысы Рэндалл Филлипс.
Regional Cooperation – Орталық және Оңтүстік Азия елдерінің қатысуымен өтетін CENTCOM-ның ең ірі оқу-жаттығу шарасы. 2026 жылы бұл оқу-жаттығу ХХХ мәрте өткізілді.
