Биылғы қазан айына дейін қазақстандық банктердің активтері 41,7 трлн теңгеге дейін – айына 205,7 млрд теңгеге, жыл басынан бері 4,1 трлн теңгеге және жыл ішінде 6,2 трлн теңгеге өсті, деп жазады inbusiness.kz, finprom.kz порталына сілтеме жасап.
Активтердің өсімі бойынша еліміздегі ең ірі қаржы құрылымы Халық банк көш бастап тұр: бір айда 234,7 млрд теңге, жыл басынан бері 2 трлн теңге және жыл ішінде 2,8 трлн теңге өсім көрсетіп, 13,6 трлн теңгеге дейін жетті. Бұл қаржы институты банк секторының барлық жиынтық активтерінің үштен бірін және ЕДБ несие портфелінің 34%-дан астамын құрайды.
Банктің несиелік портфелі қазірдің өзінде 7,6 трлн теңгеге жетті, бұл бір жыл бұрынғыдан 2 трлн теңгеге артық. Халық банкінде жеке тұлғалар мен бизнеске арналған несие өнімдерінің кең ассортименті бар, бұл ретте банк портфелінің сапасы жылдан-жылға жақсарып келеді: мысалы, банктік несиелердегі төлеу уақыты 90 күннен астам өткен (NPL 90+) несиелердің үлесі бір жыл бұрынғы 3,2% болса, қазір небәрі 2,3%-ды құрады. Бұл еліміздің банк секторындағы ең жақсы көрсеткіштердің бірі. Салыстыру үшін: жалпы елдегі екінші деңгейлі банктер үшін бұл көрсеткіш бір жыл бұрынғы 4,3% болса, қазір 3,6%-ды құрайды.
Активтердің ай сайынғы өсімі бойынша екінші орынды ЦентрКредит Банкі иеленді: өсім 225,6 млрд теңгені құрап, 3,6 трлн теңгеге дейін жетті. Бір жыл ішінде өсім 1,6 трлн теңгені құрады. Соңғы айлардағы банк көрсеткіштерінің өсуі қаржы институты бұрынғы Альфа-банкті сатып алуымен байланысты. Кейін ол банктің атауы Эко Центр Банкі деп өзгерген болатын.
Ай сайынғы өсім бойынша алғашқы үштікте Freedom Finance Kazakhstan банкі, ол 201 млрд теңге өсім көрсетіп, активі 942,6 млрд теңгеге дейін жетті.
Ең нашар көрсеткішті "Береке банк" көрсетеді деп күтілуде: 1 трлн теңге жоғалтып, активі 1,6 трлн теңге болады деп күтілуде. Бір жыл ішінде банк бірден 2,4 трлн теңге активінен айырылды.
Жалпы алғанда, күрделі геосаяси жағдайға және бүкіл әлемде әлі де жалғасып жатқан "коронадағдарысқа" қарамастан, елдегі банк секторы тұрақты өсіп келеді. Активтердің көлемі наурыз-мамыр айларында біршама құлдырап, маусым айынан бастап ай сайын өсім көрсетіп отыр. Ұзақ мерзімді перспективада көрсеткіштер 2019 жылдан бастап тұрақты өсуде.
Банк секторы активтерінің сапасы жақсаруда. Атап айтқанда, несие портфеліндегі NPL 90+ мерзімі өткен несиелердің үлесі ең төменгі деңгейге жетті және өткен жылдың қараша айынан бері 4%-дан асқан жоқ.
