Қазақстан Республикасының Біріккен Араб Әмірліктеріндегі елшісінің кеңесшісі әйелін ұрып-соққан. Бұл туралы қазақстандық дипломаттың әйелі Карина Мамаш желіде тиісті бейнеүндеу жариялады, деп хабарлайды inbusiness.kz сайты.
"Мен, Мамаш Карина Госманқызы, БАӘ-дегі елшінің кеңесшісі Мамаш Сәкен Тәшкенбайұлының жұбайымын. 10 жыл бойы зорлық-зомбылыққа ұшырап келемін. Маған көрсеткен бүкіл қорлығы – оның ішінде физикалық, сексуалдық, эмоционалдық, экономикалық, тұрмыстық зорлық-зомбылық үшін күйеуімді дипломат мәртебесінен айырып, түрмеге отырғызғанын қалаймын", - деді Карина Мамаш.
Сөзінше, 5 мамыр күні күйеуі оған және оның әпкесіне күш көрсеткен.
Өз кезегінде Ішкі істер министрлігі мән-жайды Сыртқы істер министрлігінен анықтауымызды сұрады.
"Біз бұл қызметкерді Қазақстанға шұғыл қайтарып жатырмыз. Оның ісімен құқық қорғау органдары айналысады", - деді Сыртқы істер министрлігінің ресми өкілі Айбек Смадияров inbusiness.kz-ке берген жауабында.
