ҚР Ауылшаруашылығы вице-министрі Ербол Тасжуреков Германияда Дүниежүзілік "GFFA" азық-түлік және ауыл шаруашылығы жөніндегі форумға барды, деп хабарлайды inbusiness.kz
"2024 жылғы халықаралық "Жасыл аптаның" ауқымды іскерлік бағдарламасы жетекші өндірушілердің озық тәсілдерімен және жетістіктерімен танысуға және бүкіл әлемнің ауыл шаруашылығы саласының көшбасшыларымен байланыс орнатуға тамаша мүмкіндік береді" ,- деп атап өтті Ербол Тасжүреков неміс және қазақстандық журналистерге берген сұхбатында.
Қазақстан алғаш рет 2018 жылы "Жасыл аптада" өзінің павильонын ашып, 10 отандық ауыл шаруашылығы өнімін өндірушілердің өнімін әлемге таныстырды. Биыл көрмеге 20-дан астам қазақстандық компания қатысуда. Экспозицияда ет өнімдері, бие мен түйенің құрғақ сүті, ұн, өсімдік майлары, кондитерлік өнімдер, бал, жент, жеміс шырындары бар.
Германия - Қазақстанның, әсіресе экономика мен ауыл шаруашылығы саласындағы маңызды серіктесі. 2023 жылдың қаңтар-қараша айларында екі ел арасындағы ауыл шаруашылығы өнімдерінің тауар айналымы 113,7 млн долларды құрады. Бұл 2022 жылдың сәйкес кезеңінен 18,3%-ға артық. Осы уақыт ішінде Қазақстаннан Германияға 26,2 миллион АҚШ доллардың ауыл шаруашылығы тауарлары экспортталды. Сонымен қатар, негізгі жеткізілім балық филесі мен басқа да балық өнімдері болып келеді (16,9 млн. АҚШ доллары; 2,2 мың тонна). Қазақстан өз кезегінде Германиядан тек шоколад және құрамында какао бар басқа да дайын өнімдерді 24 миллион АҚШ долларға импорттады (2023 жылдың қаңтар-қараша айларында Германиядан Қазақстанға жалпы импорт 87,5 миллион АҚШ долларды құрады).
Ербол Тасжурековтың айтуынша, германиялық инвесторлардың қатысуымен CLAAS және HORSCH компанияларының ауыл шаруашылығы техникаларын құрастыру жобасы іске асырылған. Қазіргі уақытта Baumann GmbH компаниясының қуаты жылына 30 мың тонна қой етін өңдейтін зауыт салу туралы келіссөздер жүргізілуде.
"Германиядағы дүкен сөрелеріндегі отандық тауарлардың ассортименті жыл сайын кеңейе түсетініне сенімдімін. Қазақстанның бұл көрмеге қатысуы дәстүрге айналды және іскерлік байланыстар орнатуға, тәжірибе алмасуға жаңа бірлескен жобаларды іске асыруға ықпал ететін маңызды оқиға болып табылады", - деп атап өтті вице-министр сұхбат барысында.
