/img/tv1.svg
RU KZ
Қазақстандық конькиші командаласының қателігінен жүлдесіз қалды

Қазақстандық конькиші командаласының қателігінен жүлдесіз қалды

Лозаннада өтіп жатқан жасөспірімдер Олимпиадасында қазақстандық Алина Дауранова күміс жүлдеден қағылды.  

16 Қаңтар 2020 21:25 522

Қазақстандық конькиші командаласының қателігінен жүлдесіз қалды

Конькимен жүгіруден сынға түскен ол командаласының қателігінен жүлдегерлер тізіміне енген жоқ деп жазады Olympic.kz. 

Спортшылар аралас командалық сында қысқа қашықтыққа жарысудан бақ сынаған болатын. Ол колумбиялық Диего Амая, қытайлық Живен Ксю және Беларусь өкілі Карина Шипулямен бір топтың намысын қорғаған. 

Жарыс қорытындысы бойынша Алина Дауранованың командасы екінші орынға тұрақтады. Алайда, колумбиялық спортшының қателігінен команда жарыстан шеттетілді.

Командалық спринт өте қиын және салыстырмалы түрде алатын болсақ жаңа бағдарлама саналады. Бұл бәсекеде жас спортшылар ғана емес, әлем кубоктерінде сынға түсетін тәжірибелі конькишілер де қателік жібереді. 

«Конькишілер жақсы нәтиже көрсетті. Әр спортшы жеңіс үшін тырысып бақты. Алина өз айналымын жоғары деңгейде жүгіріп өтті. Бірақ колумбиялық спортшы уақытынан бұрын командаласын алмастырған», – дейді бапкер Татьяна Михалева. 

Швейцария Лозаннада медаль жағынан көш бастап тұр

Олимпиаданың алғашқы күнінде 6 елдің өрендері ғана жүлдеге ілікті.

12 Қаңтар 2020 14:23 343

Швейцарияның Лозаннасында өтіп жатқан жасөспірімдер Олимпиадасының алғашқы күнінде 6 елдің өрендері ғана жүлделерге ие болды, деп хабарлайды Prosports.kz.

Швейцариялықтар 3 алтын, 2 күміс және 1 қоламен қарсыластарынан қара үзіп кетті. Швеция құрамасы 1 алтынмен екінші орынға жайғасса, 1 күміс, 1 қоласы бар Франция командасы үштікті қорытындылап тұр.

Лозаннада ІІІ жасөспірімдер қысқы Олимпиадасы басталды

Жасөспірімдер Олимпиадасының ашылу салтанатына Швейцарияға аттанған қазақстандық спортшылардың алғашқы легі қатысты. 

10 Қаңтар 2020 10:00 428

Швейцарияның Лозанна қаласындағы «Malley» мұз сарайында ІІІ қысқы жасөспірімдер Олимпиадасының ашылу салтанаты өтуде. Салтанатты шеруге Қазақстан ұлттық құрамасы да қатысты, деп хабарлайды Olympic.kz.

Жасөспірімдер Олимпиадасының ашылу салтанатына Швейцарияға аттанған қазақстандық спортшылардың алғашқы легі қатысты. Еліміздің көк байрағын тау шаңғысынан сынға түскен Владислав Шлемов көтеріп шықты. 

«Еліміздің көк туын көтеріп шығу үлкен абырой. Кеудемді мақтаныш сезімі кернеп тұр. Бір жағына, жауапкершілік те артуда. Шынын айтқанда, аздап қобалжып тұрмын. Қазақстанның байрағын мұндай ірі бәсекеде көтеріп шығу міндетін алғаш рет орындайын деп тұрмын. Бұрын-соңды еліміздің туын алып шығу мәртебесі бұйырмаған. Ашылу салтанаты аяқталған соң, жарысқа дайындаламыз. Жақсылап өнер көрсетуді мақсат еттік», – дейді Владислав. 

Айта кетелік, тау шаңғысынан сынға түсетін спортшылар Олимпиадада алғашқылардың бірі болып бақ сынайды. Владислав Шлемов пен Александра Троицкая 10 қаңтар күні Супергигант бағдарламасы бойынша сынға түседі.