Қазақстандық құтқарушылар Орталық коммуникациялар қызметінде өткен брифингте Түркиядағы іздеу-құтқару жұмыстары туралы айтып берді, деп жазады inbusiness.kz.
"Ең алдымен нысандар мен ғимараттарға барлау жұмыстары жүргізілді. Сол үйінділерді сыртынан қарап, қиранды қайтадан құламайтындай, алдын ала техникалық қауіпсіздік ережелерін сақтай отырып, шаралар қолдандық. Арнайы тіреулер қойып, содан кейін ғана үйінділердің астына кірдік. Сондай құтқару операциясының бірі туралы айтатын болсам. Тірі адамдардың дауысын естідік, оның екеуі қызы мен анасы болатын. Үшінші адамның сөйлеуге мұршасы алмады. Себебі қиранды астында болғандықтан, аяқ-қолы қысылып қалған еді", - деп еске алды құтқарушы Исламбек Амангелдінов.
Астана қаласы Апаттар медицина орталығының дәрігері Қуат Ибраевтың сөзінше, дәрігерлер де құтқарушылар сияқты ауысыммен жұмыс істеген.
"Ауысыммен жұмыс істедік. Дәлірек айтқанда, 16 сағат жұмыс істеп, 8 сағат демалдық. Құтқару кезінде біздің негізгі міндетіміз құтқарушылар алып шыққан жарақаттары бар адамға медициналық көмек көрсету болды. Біз қауіпті аймаққа кірген жоқпыз", - деді дәрігер.
Төтенше жағдайлар бірінші вице-министрі Ибрагим Күлшімбаевтың сөзінше, қазақстандық құтқарушылар тобы екі елдімекенде орналастырылыпты.
"Негізгі топ Газиантептің өзінде болды. Біз қаладан 14 шақырым жерде тұрдық. Бұл ең қауіпсіз деп есептелінетін аумақ – зауыттар мен фабрикалар орналасқан қаланың өнеркәсіптік ауданы. Түрік тарапы бізге берген зауыттардың бірінде тұрдық. Бұл нысанда отандық құтқарушылардан бөлек Түркия тұрғындары, осы фабриканың қызметкерлері мен олардың отбасылары да болды. Нұрдағы қаласында біздің құтқарушыларымыз өздігінен шатырларға орналастырылды", - деп атап өтті вице-министр.
Айта кету керек, қазақстандық құтқарушылардың Түркиядағы іздестіру-құтқару жұмыстары аяқталып, елге оралған болатын.
