Армиялық халықаралық ойындарының "Танк биатлоны" байқауына қатысу үшін іріктеліп алынған Қазақстан Қарулы Күштерінің үздік танк экипаждары Мәскеу облысындағы "Алабино" полигонына келді, деп хабарлайды Қорғаныс министрлігінің баспасөз қызметіне сілтеме жасап inbusiness.kz.
Команда келісімен карантинге жіберіліп, әскери қызметшілерден коронавирусқа қарсы ПТР тест алынды деп жазылған ведомство таратқан ақпаратта.
Қажетті алдын-алу шараларынан кейін танкішілер байқауға қатысу үшін Ресей тарапы ұсынған Т-72Б3 танктерін қабылдап, жаттығуға кіріседі.
Биыл танк экипаждарының жарысы 22 тамыз бен 4 қыркүйек аралығында өтеді. Қазақстандық танкішілер "Танк биатлонының" тұрақты қатысушылары болып табылады және өздерін жарыстағы фавориттердің бірі ретінде таныта білді.
