Қазақстандық бизнес пен интернет алпауытының арасындағы серіктестікті ретке келтіруге ҚР Сауда және интеграция министрлігі көмектеспек, деп хабарлайды Қытайдың CGTN басылымы.
Халықаралық электронды алаңына енуге 600-ге жуық отандық кәсіпорын қызығушылық танытқан. Әзірге тек 50-і іріктеліп алынды, кейін тағы 50-і қосылады.
Сауда саясатын дамыту орталығы E-commerce департаментінің директоры Ернар Бақтияровтың айтуынша, алтын аккаунты бар қазақстандық тауар өндірушілерінің Alibaba-да арнайы мини-сайттары болады. Мұндай сайттардың артықшылығы көп: тауарды сатып алушылар санын көбейтеді. Мысалы: бір импортер Alibaba сайтынан ұн сатып алғысы келсе, қазақстандық тауар тізімнің бас жағында тұратын болады.
Жылдың соңына дейін қазақстандық кәсіпорындарға 100 алтын сертификат табысталмақ. Мұның арқасында Alibaba-да елімізден шығарылған өнімдердің бөлек павильоны құрылады.
