Биылғы бірінші тоқсандағы деректерге сәйкес, елімізде 9 млн адам еңбекпен қамтылған. Соның ішінде 76,7%-ы аптасына 36-40 сағат жұмыс істеген. Олардың саны бір жылда 6,9 млн адамға дейін өсті, деп жазады inbusiness.kz finprom.kz порталына сілтеме жасап.
Тағы 14,3%-ы аптасына 41 немесе одан да көп сағат жұмыс істеген. Олардың саны – 1,3 миллион адам. Бұл былтырғы көрсеткіштен 8,2%-ға аз.
"679,2 мың адам аптасына 35 сағаттан аз уақыт жұмыс істеген: бір жылда +30%. Оның ішінде 2,5 мың адам 5 және одан аз сағат еңбек етті, тағы 40,2 мың адам – 6-10 сағат, 90,1 мың адам – 11-15 сағат, 74,5 мың адам – 16-20 сағат, 241,7 мың адам – 21-25 сағат, 79,9 мың адам – 26-30 сағат, 150,4 мың адам – 31-35 сағат", - делінген хабарламада.
Қазақстандықтардың орташа жұмыс уақыты аптасына 38 сағатты құрады. Оның ішінде ер адамдарда – 40 сағат, әйелдерде – 37 сағат.
Жас ерекшеліктеріне келсек, 35-44 жас аралығындағы халық белгіленген уақыттан да көп жұмыс істеген: 378,4 мың адам. "Еңбекқорлар" қатарында 45-54 жас (283,1 мың адам) және 29-34 жас (242,7 мың адам) аралығындағы адамдар да бар. Жастар арасында 41 және одан да көп сағат жұмыс істегендердің арасында 16-24 жас аралығындағы 122,5 мың адам бар, сондай-ақ 25-28 жас аралығындағы 128,8 мың адам.
Бұдан бөлек 55-64 жас аралығындағы 137,2 мың адам, 65 және одан жоғары жастағы 2,6 мың адам нормадан тыс жұмыс істеген.
