Біздің ел осыдан 3 жыл бұрын азық-түлік қауіпсіздігі бойынша әлемдегі 113 мемлекеттің ішінде 57-орында болған. Содан бері жағдай жақсармаған. Бұл туралы мәжілісте өткен үкімет сағатында айтылды.
"Бүгінге дейін ауыл шаруашылығы министрлігі агроөнеркәсіптік кешенді дамытудың 2017-2021 жылдарға арналған бағдарламасын әзірледі. Сауда және интерграция министрлігі сауданы дамытудың 2021-2025 жылдарға арналған мемлекеттік бағдарламасын таныстырды. Бұл құжаттар ішкі нарықты отандық тауар өндірушілердің өнімдерімен қамтуға ықпал етуді көздейді. Азық-түлік бағасын тұрақтандыру және оның қымбаттауына жол бермеу стратегиялық маңызға ие. Бағаның негізсіз көтерілуі тұтынушылардың сатып алу мүмкіндігін шектеп қана қоймай, олардың өмір сүру сапасын төмендетеді. Соңғы 3 жылдан бері жағдай жақсарған жоқ. Біз азық-түлік қауіпсіздігі бойынша оң нәтижеге жете алмай отырмыз", – деді мәжіліс төрағасының орынбасары Владимир Божко.
Оның сөзінше, жалақы мен әлеуметтік төлем өскен сайын азық-түлік бағасы қымбаттайды. Ал қымбатшылық қарапайым адамдардың қалтасын қағады.
"Бағаның негізсіз қымбаттауының салдарынан ел азаматтарының азық-түлік алуға жұмсайтын қаражатының көлемі 5,3 трлн теңгеге жетті", – деді Владимир Божко.
Мәжіліс төрағасы орынбасарының айтуынша, ел азаматтары азық-түліктің тұтыну себетін алуға жалақыларының 50%-ын санап береді.
"Азық-түлік тауарларының 11 түрі бойынша ішкі нарықты импорттың үлесі басым. Мысалы, сырттан келген балық балық - 73%, ірімшік - 49%, шұжық - 38%, маргарин - 66%, кептірілген жеміс - 100%, тауық еті - 45%, жүзім - 51%, консервіленген жеміс - 85%-ды құрайды" – деді ол.
Сөз арасында Владимир Божко "Атамекен" ұлттық кәсіпкерлер палатасының дерегін алға тартып, шетелден келетін сиыр етін сатып алуға жылына 81 млн, макаронға - 32 млн, қызанаққа - 39 млн, сарымсаққа - 21 доллар жұмсайтынымызды жеткізді.
Мәжіліс төрағасы орынбасарының мәлімдеуінше, өткен жылы әлеуметтік маңызы зор және күнделікті тұтынылатын азық-түлік бағасы 10,4%-ға қымбаттаған.
"Былтыр азық-түлік бағасын шектен тыс қымбаттатудың 67 фактісі тіркелді", – деді Владимир Божко.
Қанат Махамбет
