Қазақстандықтардың басым бөлігі баспананы қарызға алады. Банктерге берешегі бар тұрғындардың 90 пайызы қаржыны пәтер сатып алу үшін жұмсаған, деп хабарлайды Atameken Business.
Арасында 2 бөлмелі пәтерлерге сұраныс көп. Азаматтардың 40 пайызға жуығы қос бөлмелі баспананы сатып алса, 27 пайызға жуығы бір бөлмелілерді қанағат етеді. Ал 4 және 5 бөлмелі баспаналарға сұраныс аз.
Отбасы банкі жыл басынан бері 771 млрд теңгеге 46 мың несие берген. Елімізде мұндай қарызға 40 жастан асқан отбасылы азаматтар жүгінеді.
Нұр-Сұлтан, Алматы, Қарағанды, Шығыс Қазақстан мен жақында құрылған Ұлытау, Абай облыстарының тұрғындары баспананы қарызға алу көшін бастап тұр. Сондықтан баспана нарығының сарапшысы Ерболат Маңғышпан Нұр-Сұлтан мен Алматы қалаларына арналған арнайы бағдарламалардың санын арттыру керек деп отыр.
