Халықтың өмір сүру сапасын зерттеуге арналған сауалнама қорытындысына сәйкес, осымен екінші жыл қатарынан өзінің қаржылық жағдайына толық қанағаттанған азаматтардың үлесі азайып отыр. Биыл респонденттердің 32,1%-ы болса, 2021 жылы ол 40,2%-ды құраған, деп жазады inbusiness.kz порталы ranking.kz-ке сілтеме жасап.
Дегенмен қаржылық жағдайына ішінара қанағаттанған жандардың үлесі бір жыл ішінде 56,3%-дан 64%-ға дейін өсті. Ал сұралғандардың 0,6%-ының қаржылық жағдайына көңілі толмайды. Сауалнамаға қатысқан 3,3% адам жауап беруге қиналған.
Отбасындағы экономикалық жағдайға толық қанағаттанған респонденттердің үлесі бір жылда 44,1%-дан 34,7%-ға дейін қысқарып отыр. "Ішінара қанағаттанамын" жауабын таңдағандар үлесі 52,8%-дан 63%-ға дейін өскен. Ал отбасындағы қаржылық жағдайға көңілі толмайтындар үлесі азайып, бір жыл ішінде 1,1%-дан 0,5%-ға түскен. Жауап беруге қиналған респонденттер үлесі 1,8% болды.
Өздерінің қаржылық жағдайына көңілі толатындар арасында ерлер басым. Әйелдер 29,5% болса, ерлер – 35,9%. Ал материалдық жағдайына риза емес респонденттер үлесі бірдей екен.
Қаржылық жағдайына қанағаттанған респонденттердің ең көп үлесі – өзін-өзі жұмыспен қамтығандар (35,7%). Екінші орында жалдамалы жұмысшылар (33,3%) екен.
Материалдық қамтамасыз ету деңгейін орташа деп бағалаған респонденттердің үлесі 80%-ға жетті. Былтыр бұл көрсеткіш 65,6%-ды құраған. Материалдық жағдайын орта деңгейден төмен деп көрсеткендердің үлесі айтарлықтай азайып, 11,6%-дан 2,3%-ға дейін жетіп отыр.
Айта кетейік, халықтың өмір сүру сапасын зерттеуге арналған сауалнама жыл сайын наурыз айында өткізіледі.
