2021 жылдың қаңтар-қазанында халықаралық ақша аудару жүйелері арқылы шетелге жөнелтілген қаражат көлемі 834,3 млрд теңгені құрады, бұл өткен жылдың сәйкес кезеңімен салыстырғанда 31,3%-ға артық, деп хабарлайды inbusiness.kz тілшісі finprom.kz-ке сілтеме жасап.
Қазақстаннан шетелге жөнелтілген ақша көлемі шетелден алынған сомадан 3,6 есе көп: мысалы, Қазақстанға шетелден 233,4 млрд теңге аударылды – 2020 жылдың қаңтар-қазан айларымен салыстырғанда небәрі 0,6%-ға көп.
Шетелге жіберілген ақшаның жартысынан астамы Өзбекстан (255,4 млрд теңге) мен Түркияға (167,8 млрд теңге) аударылған. Өзбекстанға аударымдар көлемі 2 есеге жуық, Түркияға 1,5 есе өсті.
Тағы үштен бір бөлігі Ресей (149,2 млрд теңге) мен Қырғызстанға (122,8 млрд теңге) аударылды, бұл ретте Ресейге аударымдар көлемі 13,1%-ға, Қырғызстанға – 10,3%-ға қысқарды.
Ақша аударымдары жүйелері арқылы шетелден түскен қаржы көлемінің жартысы үш елдің үлесіне тиді: Ресей (45,8 млрд теңге), Өзбекстан (39,6 млрд теңге) және Оңтүстік Корея (33,2 млрд теңге).
Құралай Құдайберген
