Demoscope бюросы халықтың шерулерге көзқарасын анықтау үшін арнайы әлеуметтік сауалнама жүргізген. Нәтижесінде респонденттердің 43%-ы бейбіт митингілерді қолдаса, 41 %-ы жауап беруден бас тартқан, ал 16%-ы теріс көзқараста екенін айтқан.
"Көпшілік жеке қауіпсіздік тұрғысынан жауап бергілері келмеді. Қалай болғанда да, респонденттердің басым бөлігі бейбіт шерулерді қолдайтыны анықталды", – деді зерттеу авторлары.
Одан бөлек сауалнамаға қатысқандардың 46%-ы митингілер ел үкіметі қабылдайтын шешімдерге әсер ететініне сенеді. Респонденттердің 40%-ы шерулер елдегі жағдайды ушықтырып жібереді деп есептейді. Ал сұралғандардың 14 %-ы бұл сұраққа жауап беруден бас тартқан.
Сонымен қатар, респонденттердің 73%-ы митингілерді биліктің рұқсатымен өткізу керек деген пікірде. Ал қалған 17%-ы олармен келіспейді.
"Егер қазақстандықтар дамыған демократия жағдайында өмір сүрмегенін, халықаралық құқық стандарттарымен жақын таныс еместігін ескерсек, бұл көрсеткіштер қалыпты", – дейді Demoscope бюросының өкілдері.
Қоғамдық пікірдің тағы бір индикаторы митингілерге қатысқандарды тұтқындау мәселесіне қатысты болды. Олардың 58%-ы белсенділерді заңсыз ұстады десе, 24%-ы билікті қолдайды, бейбіт шеруге шыққандарды қоғамдық тәртіпті бұзды деп есептейді.
Жалпы сауалнамаға еліміздің 14 облысы бойынша 1100 адам қатысқан.
