Астанада Қазақстан мен Кипр өкілдерінің басқосуы өтті, деп хабарлайды inbusiness.kz сайты.
Кездесу барысында тараптар екі ел арасындағы туристік ынтымақтастықты арттыру мәселелерін талқылаған болатын.
Халықаралық сарапшылардың пікірінше, қазіргі кезде туризм әлемдік экономикадағы қарқыны төмендемейтін саланың біріне жатады. Туризм бірқатар елде жалпы ішкі өнімнің қалыптасуына, қосымша жұмыс орнын құруға және сыртқы сауда балансының белсенділігіне ықпал етеді.
Осы орайда, қатысушылар Қазақстан мен Кипр арасындағы туризм ауқымын ұлғайту үшін қолайлы жағдайлар жасаудың маңыздылығын атап өтілді.
Бұл ретте, жыл соңына дейін Астанада Кипр Елшілігінің ашылуы басты қадамдардың бірі болмақ. Әлбетте, бұл қазақстандықтарға Кипрге баруда виза алу процесін едәуір жеңілдетеді, өйткені бұған дейін барлық визалық мәселелер Мәскеудегі елшілік арқылы шешілген еді.
Сондай-ақ кездесуде Қазақстан мен Кипр арасында тікелей әуе рейстерін іске қосу мүмкіндігі талқыланды.
Бүгінде Cyprus Airlines және басқа авиакомпаниялармен келіссөздер жүргізілуде. Бұл тікелей әуе қатынасын орнатуға және Кипрге саяхатты қолжетімді етуге мүмкіндік береді. Тікелей рейстердің ашылуы нәтижесінде Кипр бағыты Дубай, Мальдив және Түркия сияқты мемлекеттерге лайықты балама бола алады деп күтілуде.
Айта кету керек, Кипр туристерді демалыс мүмкіндіктерінің алуан түрлілігімен тартады: әдемі жағажайлар мен биік таулар ғана емес, сонымен қатар мәдени және тарихи көрнекті орындарымен қызықтырады. Кипр аралы демалу үшін тартымды әрі тың маршруттарды іздейтін қазақстандықтар үшін жаңа бағыт.
Кипр делегациясы Қазақстан Республикасы да Кипр тұрғындары үшін тартымды туристік бағытқа айналуы мүмкін екенін атап өтті. Өзгеше мәдениеті, бірегей табиғаты мен қазақ халқының қонақжайлылығы кипрліктерді саяхаттауға жаңа бағыт ретінде қызықтыруы мүмкін.
