1 сәуірден бастап Қазақстанның жүргізуші куәліктері Ресейде жарамсыз болып танылды. Себебі тиісті түзетулер күшіне енді, деп хабарлайды inbusiness.kz сайты ресейлік БАҚ-қа сілтеме жасап.
Енді Ресейде тұруға рұсқсаты бар немесе Ресей азаматтығын алған шетелдіктер бұл елдің жүргізуші куәлігін алуға міндетті. "Жол қозғалысы қауіпсіздігі туралы" заңға сәйкес, тиісті талап 2024 жылдың 1 сәуіріне дейін Ресей азаматтығын алған немесе Ресейде тұруға рұқсат алған және шетелдік жүргізуші куәліктері бар ресейліктерге қатысты. Егер 1 сәуірден кейін Қазақстанның немесе басқа шетелдің куәліктерімен көлік тізгіндейтін болса, онда бұл заңсыз болып саналады. Ереже бұзғандарға 15 мың рубльге (90 мың теңгеге дейін) дейін айыппұл салынады.
Бұл норма Беларусь азаматтары мен Беларусьтің жүргізуші куәлігі бар Ресей азаматтарына қатысты емес.
Бұған дейін шетелдік жүргізуші куәліктерін Ресейде ауыстыру үшін емтихан тапсырудың қажеті болмаған. Алайда бұл жеңілдетілген кезең 1 сәуірде аяқталды. Ішкі істер министрлігі бұл мүмкіндікті 500 мыңнан астам жүргізуші пайдаланғанын хабарлады. Енді М, А және B санаттары бойынша жүргізуші куәлігін ауыстыру үшін теориялық емтихан тапсыру қажет. C және D санаттары бойынша алдымен авто-мектептен оқу міндетті.
