Цифрлық даму, инновациялар және аэроғарыш өнеркәсібі министрі Жаслан Мәдиев бір адамның қолына берілетін SIM-карта санын шектеуге байланысты пікір білдірді, деп хабарлайды inbusiness.kz сайты.
Министр бұл бастама Мәжілісте талқыланып жатқанын айтты.
"Бұл тікелей шектеу емес. 10 SIM-картадан көп алатын болса, жүйеде оларды қай мақсатпен алатынын көрсетуі керек. Кейбір компаниялар 50-100 шақты SIM-картаны сатып алып, бір қолға беретіндерін білеміз. Осы проблемамен күресуге қатысты ұсыныстарымыз дайын", - деді Жаслан Мәдиев Мәжіліс кулуарында.
Тілшілер "Сим-картаны қолдану мақсатын көрсету арқылы 15-20 SIM-карта да сатып алуға бола ма?" деп нақтылады.
"Болады", - деп қысқа қайырды министр.
Оның сөзінше, мобильді операторлардың технологиялары бар.
"Трафик арқылы SIM-картаның о бастағы мақсаты үшін пайдаланылмай жатқанын анықтауға болады", - деді Жаслан Мәдиев.
Цифрлық даму министрі SIM-картаны мақсатсыз пайдаланатындар үшін нақты қандай жауапкершілік болатынын айтпады. Олардың қатарында айыппұл санкциялары да қарастырылуы мүмкін.
