Мұны Қытай ұлттық теңіз мұнай корпорациясы CNOOC хабарлап отыр, деп жазады inbusiness.kz сайты.
Дәлелденген геологиялық қоры бар ірі мұнай кен орны Оңтүстік Қытай теңізінің шығыс бөлігінде ашылғанын Синьхуа агенттігі де растады.
CNOOC мәліметінше, "Хуэйчжоу 19-6" деп аталатын жаңа мұнай кен орны жуырда Қытайда ашылған. Терең және аса терең қабаттарда орналасқан сынық жыныстары бар ауқымды кен орны Қытай қайраңында бірінші рет табылған.
Кен орны Қытайдың оңтүстігіндегі Шэньчжэнь қаласынан шамамен 170 шақырым жерде, 100 метр тереңдікте орналасқан. Сынақ бұрғылау кезінде тәулігіне 413 баррель мұнай мен 68 мың текше метр газ өндірілген. Бұл оның әлеуетін әйгілей түседі.
Теңіз қайраңындағы мұндай терең қабаттарда мұнай мен газды барлау кезінде жоғары қысым мен температура, сондай-ақ тау жыныстарының төмен өткізгіштігі секілді қиындықтар туындап отырады. Бұл өз кезегінде үлкен кен орындарын анықтауды қиындатады. Десе де, әлемдік мұнай мен газ қорының көпшілігі осы терең қабаттарда орналасқан және оларды барлау келешекте өндірістің айтарлықтай өсуін күттіреді.
Қытайлық CNOOC мұнай компаниясы соңғы жылдары Оңтүстік Қытай теңізінің шығысында бірнеше ірі ашылу жасады, бұл аймақтағы мұнай мен газ қорының одан әрі өсуіне мүмкіндік беріп отыр.
