Мемлекеттік кірістер комитетінің мәліметінше, 2023 жылдың қаңтар-тамыз айларында Қазақстан басқа елдерге 3,8 млн долларға гуманитарлық көмек жіберген. Бұл өткен жылдың тиісті кезеңіне қарағанда 3 есе аз. Шетелден алынған гуманитарлық көмек көлемі 37,8%-ға артып, 24,9 млн доллар болды, деп жазады inbusiness.kz ranking.kz порталына сілтеме жасап.
Биылғы 9 айда Қазақстаннан гуманитарлық көмектің айтарлықтай көлемі Тәжікстан (1,7 млн доллар) мен Ауғанстанға (1,6 млн доллар) жөнелтілген. Ақпанда күшті жер сілкінісі болған Түркия мен Сирияға да гуманитарлық көмек жіберілді: тиісінше 338,6 мың доллар және 11,5 мың доллар. Украинаға 101,7 мың доллар жөнелтілді.
Көрсетілген кезеңде шетелден гуманитарлық көмектің ең көп көлемі Бельгиядан келді: 20,7 млн доллар. Бұдан бөлек еліміз Германиядан да қомақты көлемде гуманитарлық көмек алды: 3,5 млн доллар. Басқа мемлекеттерден келген гуманитарлық көмек көлемі – 696,5 мың доллар.
Еліміз жіберген гуманитарлық көмектің ең көп көлемін азық-түлік тауарлары құрайды (1,9 млн доллар). Одан кейінгі орында киім-кешек пен аяқ (168,1 мың доллар), машина мен жабдық (88,3 мың доллар) орналасты.
Алынған гуманитарлық көмектің ішінде негізгі көлем дәрі-дәрмек үлесіне тиеді (12,1 млн доллар). Бұдан басқа 454,2 мың долларға киім мен аяқ киім, 16,9 мың долларға машина мен жабдық келді.
