Ресейден әкелінген есіркіні Қазақстан аумағы арқылы Өзбекстанға кіргізбек болған азамат ұсталды, деп хабарлайды inbusiness.kz сайты Kazinform агенттігіне сілтеме жасап.
Өзбекстан Мемлекеттік қауіпсіздік қызметінің мәліметінше, қазақ-өзбек шекарасындағы "Қапланбек" – "Науаи" кеден бекетінде күдік тудырған Lada Largus көлігіне тексеріс жүргізілді. Оның барысында темір тұлпарға тиелген жүктердің арасына жасырылған 2,3 келі мефедрон анықталды.
Тапсырысқа сай, ол есірткіні Қашқадария облысындағы ер адамға жеткізуі қажет. Тиісінше, қауіпсіздік органдарының қызметкерлері мефедронды қабылдап алуы тиіс азаматты препаратты күтіп алу барысында қолға түсірді.
Ұсталған 2 күдіктіге қатысты "Есірткіні заңсыз дайындау, сатып алу және сақтау" бабы бойынша қылмыстық іс қозғалып, олар қамауға алынды.
