Оқу-ағарту министрі Ғани Бейсембаев еліміздің 10 колледжін интернационализациялатынын айтты, деп хабарлайды inbusiness.kz сайты.
"Жұмысшы мамандықтар жылы жоспарда қамтылған негізгі шаралардың бірі – еліміздің 10 колледжін интернационализациялау. Оның негізгі мақсаты – Қазақстан колледждерінің жаһандық деңгейде бәсекеге қабілеттілігін арттырып, білім беру бағдарламаларының халықаралық стандарттарға сәйкестігін қамтамасыз ету. Менеджменттің үздік халықаралық тәжірибесін енгізу үшін шетелдік менеджерлерді тарту арқылы колледждерді басқарудың озық әлемдік модельдерін енгізу іске асырылады", – деді министр.
Ғани Бейсембаевтың сөзінше, бұл жұмыстардың аясында педагогтарымыз шетелдік колледждерімен тәжірибе алмасып кәсіби деңгейін арттырады.
"Студенттеріміз академиялық ұтқырлық тәртібімен аталған оқу орындарында білімін жетілдіреді. Нәтижесінде колледждердің бәсекеге қабілеттілігі жоғарылап, білім сапасы халықаралық деңгейге көтеріледі", – деп атап өтті министр.
